रामेछाप । जिल्लामा उपमेयर्स फोरम गठन भएको छ । स्थानीय तहहरुका उप-प्रमुख तथा उपाध्यक्षहरुले मन्थली नगरपालिकाकी उपप्रमुख इश्वरी बस्नेतको संयोजकत्वमा उपमेयर्स फोरम गठन गरेका हुन् ।
मन्थली नगरपालिकामा भएकाे न्यायीक समितीको अन्तरपालिका स्तरीय बैठकमा मबस्नेतको संयोजकत्व ८ सदस्यीय समिति गठन गरेकाे छ ।
फोरमको सहसंयोजकमा रामेछाप नगरपालिकाकी उपप्रमुख बालाकुमारी कार्की चयन भएकी छिन् । फोरमको सदस्यहरुमा सुनापति गाउँपालिकाकी उपाध्यक्ष गिता विष्ठ, दोरम्बा शैलुङ गाउँपालिकाकी उपाध्यक्ष खमला थापा मगर, गोकुलगंगा गाउँपालिकाकी उपाध्यक्ष उषा कार्की, उमाकुण्ड गाउँपालिकाकी उपाध्यक्ष सावित्री सुनुवार, खाँडादेवी गाउँपालिकाकी उपाध्यक्ष रमा घिसिङ र लिखुतामाकोशी गाउँपालिकाकी उपाध्यक्ष दिपा पाख्रिन चयन भएका हुन् ।
स्थानीय तहका उपप्रमुख तथा उपाध्यक्षहरुले स्थानीय तहमा सम्पादन गर्ने कामहरुको अनुभव आदान प्रदान गर्ने मुख्य उद्देश्य राखेर फोरम गठन गरेको हो । फाेरम गठन पश्चात ‘न्यायिक सम्पादन, राजश्व संकलन, संघसंस्था समन्वय, अनुगमन जस्ता बिषयगत समितीका कामहरुमा अन्य स्थानीय तहबाट अनुभवहरु बटुल्न सहज हुने मन्थली नगरपालिका उपप्रमुख एंवम् फोरमका संयोजक बस्नेतले बताइन् ।
उपमेयर्स फोरम गठन भएपश्चात पालिकाहरूको आपसी सिकाइ आदानप्रदान र बिषयगत समितीका भुमिका तथा जिम्मेवारीमा एकरूपता ल्याउनका लागि सहयोग हुने कुरा द एसिया फाउण्डेशनका बागमती प्रदेश संयोजक उद्धबप्रसाद अधिकारीले बताए ।
कार्यक्रममा रिनोभेशन नेपालका कार्यकारी निर्देशक रामबाबु नेपालले न्यायीक समितीकाे सुचना व्यवस्थापन प्रणालीको प्रयोग र यसको प्रभावकारीताका बारेमा प्रस्तुती गरेका थिए । सुचना व्यवस्थापन प्रणालीको प्रयोगले न्यायीक समितीलाइ प्रकृयागत रूपमा सहयोग पुग्नुका साथै कानुनी ढाँचाहरूमा लिखत तयार गर्न न्यायीक समितीलाइ सहयोग पुग्ने बताए ।
त्यसैगरी कार्यक्रममा सहभागीले स्थानीय तहमा छलफल गर्नुपर्ने र स्पष्ट हुनु पर्ने धेरै बिषयहरू रहेका छन्,जुन सवालहरूमा एकरूपता र समाधान खोज्नका लागि यो फोरम सहयोगी हुन सक्ने बताएका छन् ।
