रामेछाप । गुणस्तरीय सेवा दिँदै सेवाग्राहीको मन जित्दै आएको जिल्लाको मन्थली नगरपालिकाको मन्थली अस्पतालले बिरामीको चापलाई मध्यनजर गर्दै विशेषज्ञ स्वास्थ्य शिविर संचालन गरेको छ । बिरामीको सधैँ चाप हुने अस्पतालले संचालन गरेको शिविरमा दुई सय बढीले सेवा लिएका छन् ।
सरकारी अस्पतालको विश्वासमा कमी आइरहेको अवस्थामा मन्थली अस्पतालले भने नागरिकको मन जित्दै आएको मन्थली नरपालिका वडा नं. २ की माइली तामाङले बताइन् । उनले भनिन् – मन्थली अस्पतालको सेवा राम्रो हुँदै गएको रहेछ । अब हामी जस्ता गाउँबाट उपचारका लागी आउनेलाई धेरै सजिलो हुने भयो ।
वडा नं. २ कै लोकमान श्रेष्ठ पनि मन्थली अस्पतालको सेवा प्रति खुसी देखिए । उनले भने – घरबाट नजिकै पर्छ मन्थली अस्पताल । यही राम्रो सेवा पाइन थालेको छ । बिरामी हुँदा राजधानी नै कुदी हाल्न पर्दैन सायद अब ।
अस्पतालले शनिवार संचालन गरेको नाक, कान तथा घाँटी सम्बन्धी स्वास्थ्य शिविरमा २ सय ७ जनाले सेवा लिएको मन्थली अस्पतालले बताएको छ ।
शिविरमा १२१ जनाले नाक कान तथा घाटी र ८६ जनाले भिडियो एक्स–रे सम्बन्धी सेवा लिएको अस्पतालका डा. समीर क्षेत्रीले जानकारी दिए । शिविरमा नाक कान तथा घाँटी सम्बन्धी समस्याहरू पिनास, रुघा लागिरहने, कान दुख्ने पाक्ने, पिप बगिरहने, कान कम सुन्ने, टनशील तथा घाँटीको सम्बन्धी समस्याहरूको जाँच तथा उपचार गरिएको क्षेत्रीले बताए ।
मन्थली नगरपालिकाले आफ्नो वार्षिक कार्यक्रम अन्तर्गत स्वास्थ्य शिविरहरू सञ्चालन गरिरहेको मन्थली नगरपालिका स्वास्थ्य शाखा प्रमुख केशवराज फुयाँलले बताए । शिविर मार्फत नागरिकले आफ्नो गाउँघरमै विशेषज्ञ सहितको स्वास्थ्य सेवा पाइरहेका छन् उनले भने ।
सेवाग्राहीको मन जित्दै मन्थली अस्पतालमा
