रामेछाप । होटेल तथा पर्यटन व्यवसायी संघ नेपाल, बागमती प्रदेशले जिल्लाको मन्थलीमा पहिलो पटक प्रदेश भरिका होटल व्यवसायीहरूलाई भित्र्याएर कार्यक्रम गरेको छ ।
संघले चौथो साधारण सभालाई अवसर बनाएर रामेछापको सदरमुकाम मन्थलीको तीनलाल पार्कमा होटल व्यवसायी भेला गरेको हो ।
संघले मन्थलीमा आयोजना गरेको कार्यक्रमले आन्तरिक पर्यटनको विकासमा महत्त्वपूर्ण सहयोग पुग्ने संघीय सांसद एवम् कार्यक्रमका प्रमुख अतिथि पूर्णबहादुर तामाङ (कान्छाराम) बताए ।
खस्कँदो अवस्थामा रहेको आर्थिक मन्दीका कारण पर्यटन तथा होटल व्यवसायीहरूमा परेको समस्यालाई समाधान गर्न संघको साधारण सभाले कोसे ढुंगा साबित हुने बागमती प्रदेशका सांसद आनन्द कुमार श्रेष्ठले बताए ।
बागमती प्रदेश सरकारले घोषणा गरेको भ्रमण वर्ष २०२४ लाई सफल बनाउन साधारण सभा प्रभावकारी भएको मन्थली नगरपालिकाका प्रमुख लव श्रेष्ठले बताए । उनले भने – साधारणसभाले मन्थलीको पर्यटनको विकासमा टेवा पु¥याउने विश्वास लिएका छौँ ।
प्रहरी प्रशासनले होटलहरुलाई समय सीमा लगाएर होटल व्यवसायी हरुलाई व्यवसाय गर्न असहज भएको होटेल तथा पर्यटन व्यवसायी महासंघ नेपालका अध्यक्ष दिनेश कुमार चुकेले वताए । चुकेले रातको समयमा पाहुनाहरु आउने र प्रशासनले होटल खोल्न नदिने हुदाँ पर्यटक तथा पाहुनाहरुलाइ स्वागत गर्न नसकिएको बताए ।
सभाले मन्थली घोषण पत्र समेत जारी गरेको पनि आयोजक पक्षले जनाएको छ । साधारण सभा पश्चात् रामेछापको पर्यटन प्रवर्द्धनका लागि सात वटै प्रदेशका व्यवसायीहरूको बिचमा अन्तरक्रिया गर्ने र उक्त अन्तरक्रिया रामेछाप पर्यटन विकासका लागि मन्थली घोषणा पत्र तयार गर्ने कार्यक्रम रहेको पनि संघको बागमती प्रदेश अध्यक्ष नेपालले जानकारी गराए । यो सँगै नयाँ कार्यसमितिले एक वर्षमा गरेका कामका बारेमा समीक्षा गरी आगामी दिनमा संघबाट गरिने कामका बारेमा योजना निर्माण गर्ने समेत नेपालले जानकारी दिए । भेलाले कोरोना भाइरस कोभिड–१९ र त्यसपछिको आर्थिक मन्दीका कारण धराशायी बन्दै गएको होटेल व्यवसायीलाई केही मात्रमा भए पनि उठाउने विश्वास पनि आयोजक पक्षले लिएको छ ।
होटेल तथा पर्यटन व्यवसायी संघ नेपालका केन्द्रीय अध्यक्ष दिनेश कुमार चुके, नेपाल पत्रकार महासंघ रामेछापका अध्यक्ष बद्री नयाँघरे र रामेछाप उद्योग वाणिज्य संघका अध्यक्ष नवीन कुमार थापा मगर लगायतका वक्ताहरूले शुभकामना दिए ।
आजको गन्तब्य टुडे दैनिक पत्रिकामा प्रकाशित छ ।
