रामेछाप । मन्थली नगरको नगर स्तरीय कक्षा ८ को नतिजा दुई पटक सार्वजनिक भएको छ । पहिलो पटक सार्वजनिक गरिएको नतिजा अनुसार नगरका ७ वटा विद्यालयको नतिजा शून्य भएको थियो । तर दोस्रो पटकको नतिजाले कुनै पनि विद्यालयको नतिजा शून्य नभएको देखाइएको छ ।
पहिलो पटक नतिजा शून्य (निल) भएको भनिएको मन्थली नगरपालिका ८ चिसापानीको १३ जना विद्यार्थीले जाँच दिएको विद्याश्रम आधारभूत विद्यालयको दोस्रो पटक सार्वजनिक गरिएको नतिजा अनुसार १२ जनालाई पास गराइएको छ । त्यसैगरी यस अघि निल गएको भनिएको १७ जना परीक्षार्थी रहेको जगदम्बा आधारभूत विद्यालय चिउरीपानीका १७ जना परीक्षार्थीहरू मध्ये १३ जनालाई पास गराइएको छ । त्यसैगरी निल गएको भनिएको ७ जना परीक्षार्थी रहेको ताम्राकौशीका आधारभूत विद्यालय टेकानपुरका ४ जना परीक्षार्थीलाई पास गराइएको छ भने ६ जना परीक्षार्थी रहेका कपिलेश्वर आधारभूत विद्यालय कौछिनीका २ जना लाई पास गराइएको छ ।
त्यसैगरी २५ जना परीक्षार्थी रहेको स्थानापती मावि बाङ्गेसल्ला का १५ जनालाई पास गराइएको छ भने २२ जना परीक्षार्थी रहेको माध्यमिक विद्यालय सिक्राल का १८ जनालाई पास गराइएको छ । नगर शिक्षा समितिले २ वा ३ विषयमा अनुत्तीर्ण भएमा बढीमा ५ नं ग्रेस दिएर पास गराउने चलन यस अघि देखि कै हो तर दुई पटक नतिजा सार्वजनिक गर्दा फरक फरक नतिजा आउनु चाहिँ राम्रो हैन । निल गएका विद्यालय मध्येका एक शिक्षकले भने – यो सिधै नगरको कमजोरी हो, यस्ता कमजोरी नसच्याउने हो भने शिक्षा क्षेत्र गुणस्तरीय बनाउन गाह्रो छ ।
यसरी दुई वटा नतिजा सार्वजनिक हुनुले बिद्यार्थीहरुमा मनोवैज्ञानिक असरपरेको शिक्षकहरू बताउँछन् । नगरका ७ वटा विद्यालय निल गएको जानकारी पाएपछि केही विद्यालयका बिद्यार्थीहरुले आफूहरू फेल हुनु नपर्ने कसरी फेल भइयो भनी सम्बन्धित विद्यालयमा निवेदन हालेको र निवेदनका आधारमा मन्थली नगर शिक्षा शाखामा गएर रिटोटलिङको लागि आवश्यक प्रक्रिया पनि गरेका थिए ।
कक्षा ८ का बिद्यार्थीहरुले ६५० पूर्णाङ्कको ७ वटा अनिवार्य पुस्तक पढ्नु पर्ने हुन्छ । त्यस मध्ये सम्बन्धित विद्यालयमा हुने त्रैमासिक र अर्ध वार्षिक परीक्षाको समेत प्राप्त ५० प्रतिशत मध्येको प्राप्त अङ्क विद्यालयले नगरलाई उपलब्ध गराउने र बाँकी रहेको ५० प्रतिशतको नगर स्तरीय परीक्षा लिई बिद्यार्थीहरुको मूल्याङ्कन गर्ने गरिन्छ । नगरले लिएको परीक्षामा पूर्णाङ्कको ३५ प्रतिशत अर्थात् ५० पूर्णाङ्कमा १८ नम्बर अनिवार्य ल्याउनु पर्ने हुन्छ ।
कक्षा ८ का परीक्षार्थीहरूको उत्तर पुस्तीका परीक्षण गर्ने व्यवस्था नगरपालिकामै गरेको भए पनि विषयगत शिक्षकलाई कापी काट्न नदिइनु, नगरका जनप्रतिनिधि र कर्मचारीका आफ्ना आफन्तहरूलाई शक्ति र पहुँचका आधारमा कक्षा ५ सम्म मात्र पढाउने शिक्षकहरूलाई उत्तर पुस्तीका परीक्षण गर्न दिनु र संम्परिक्षण गर्ने शिक्षक पनि दक्ष र अनुभवी नहुनु, उत्तर पुस्तिका परीक्षण गर्ने केही शिक्षकहरूलाई अङ्कन योजना तथा उत्तर कुञ्जीकाको आधारमा नम्बर दिनुपर्छ भन्ने हेक्का नहुनुले पनि धेरै बिद्यार्थीहरु अनुत्तीर्ण हुनाका मुख्य कारणहरू भएको शिक्षकहरू बताउँछन् ।
जति धेरै उत्तर पुस्तीका परीक्षण ग¥यो त्यति नै बढी रकम आउने र सम्परीक्षकले पनि परीक्षक सँग दुरी बढ्ने डरले राम्रो सँग सम्परीक्षण नगरेको बिशेषगरी वस्तुगत तथा गणित विषयको हिसाब सही तरिकाले गरेको छ वा मिलाएको छ भने ट्वाक्क नम्बर दिनुपर्नेमा न्यून नम्बर दिने गरेका कारण पनि बिद्यार्थीहरु अनुत्तीर्ण भएको हुन सक्ने एक शिक्षकले बताए ।
यस सम्बन्धमा के हो त भन्ने प्रश्नमा मन्थली नगरपालिकाका प्रमुख प्रशासकीय अधिकृत हरि प्रसाद चापागाईँले भने– “दुई थरी नतिजा सार्वजनिक भएको छैन,सम्बन्धित विद्यालयहरूमा जुन नतिजा (रिजल्ट) गएको छ त्यो चाहिँ आधिकारिक हो । कसले २ थरी बनायो त्यो आधिकारिक हैन ” । नगर क्षेत्रको शैक्षिक सुधार गर्नु मन्थली नगरपालिकाको कर्तव्य हो, यी दुई थरी नतिजाले नगरको शैक्षिक गुणस्तर सुधार हुनु त परै जावास झन् गुणस्तर घटाउने काम भइरहेको छ । एक पटक निल गएका विद्यालय हरू अर्कोपटक जोगिन्छन्, एकपटक फेल भनेका बिद्याथीहरु अर्कोपटक पास हुन्छन्,अनि कसरी हुन्छ नगरको शैक्षिक सुधार । यस गतिविधिबाट नगरले शैक्षिक क्षेत्रप्रति गरेको चासो स्प्रस्ट भएको शिक्षाविदहरु बताउँछन् । गन्तव्य टूडे
