विद्यार्थी र अभिभावको मन जित्दै मन्थली मावि

रामेछाप । सदरमुकाम मन्थलीमा रहेको मन्थली माविमा गुणस्तरीय शिक्षा प्रदान हुन थालेपछि सामुदायिक विद्यालयप्रति विद्यार्थी र अभिभावको मोह बढ्दै गएको हो । मन्थली माविको मेहनतका कारण विद्यालयले शिक्षाको गुणस्तरमा सुधार ल्याएर विद्यार्थी र अभिभावको मन जित्न सफल भएको छ ।
कक्षा १ देखि कक्षा १० सम्म मात्रै भर्ना अभियानको दशौँ दिन (बुधवार) १ हजारको हाराहारीमा विद्यार्थी भर्ना भई सकेको शिक्षक चन्द्र सिंह धामीले बताए । विद्यालय व्यवस्थापन समिति र शिक्षकहरूले शिक्षाको गुणस्तरको साथै विद्यालयको भौतिक संरचना निर्माण पनि ध्यान दिएको उनले बताए ।
अतिरिक्त क्रियाकलाप, खेलकुद सप्ताह, मनोरञ्जनात्मक तथा ज्ञानवर्धक नियमित कार्यक्रमहरूले विद्यार्थीको सर्वाङ्गीण विकास गर्न मद्दत गर्ने बताउँदै विद्यालयले विद्यार्थीको चाहना अनुरूप अतिरिक्त क्रियाकलापलाई दैनिक पठनपाठनसँग जोडेको धामी बताउँछन् । विद्यालयलाई राजनीतिक आग्रह पूर्वाग्रहबाट टाढा राख्न सकेमा यसले उत्कृष्ट नतिजा दिन सक्ने धामीले बताए । मन्थली नगरपालिका १ नं. वडामा रहेको मन्थली माविले आफ्ना मिहिनेती शिक्षक, कर्मचारीमार्फत विद्यार्थीको सुनौलो भविष्य निर्माणमा इटा थपिरहेको उनको भनाइ छ ।
अभिभावको चासो, शिक्षकहरूको लगनशीलता र विद्यार्थीको मेहनतकै कारण राम्रो परिणाम निकाल्न सफल भएको मन्थली माध्यमिक विद्यालयका प्रधानाध्यापक टंक प्रसाद दाहाल बताउँछन् । उनले आगामी दिनमा अझै राम्रो नतिजा ल्याउनको लागि मेहनत गरिरहेको बताए । प्रअ दाहालले भने– ‘शिक्षाको गुणस्तर राम्रो बनाउन दृढ इच्छा शक्ति र त्यसलाई कार्यान्वयन गर्ने अठोट चाहिन्छ । हामी त्यही दृढ इच्छा शक्ति र त्यसलाई कार्यान्वयन गर्ने अठोटका साथ अगाडी बढिरहेका छौँ ।’
एईई परीक्षामा पनि मन्थली मावि जिल्लाकै धेरै विद्यार्थी हुने विद्यालयको रूपमा परेको छ । जिल्लाको ८ वटा स्थानीय तहमा रहेको ९२ वटा मावि मध्ये मन्थली माविमा सबै भन्दा धेरै विद्यार्थीले यस वर्ष एईई परीक्षामा सहभागी भए ।
सरकारले सामुदायिक विद्यालयहरूमा करोडौँ लगानी गरेपनि केही विद्यालय बाहेक अन्य विद्यालयमा भने शिक्षाको गुणस्तर सुधार हुन सकेको छैन् । शिक्षकहरूमा राजनीतिको मोह, अभिभावको बेवास्ता र विद्यार्थीमा बढ्दै गएको सामाजिक सञ्जालप्रतिको मोहको कारण अपेक्षाकृत रूपमा परिणाम ल्याउन सामुदायिक विद्यालयहरू असफल हुँदै आएका छन् ।
सामुदायिक विद्यालयप्रति अभिभावको मोह घटिरहेको बेला मन्थली माविले भने इच्छा शक्ति हुने हो भने सामुदायिक विद्यालयमा पनि राम्रो गुणस्तरीय शिक्षा प्रदान गर्न सकिने भन्ने उदाहरण प्रस्तुत गरेको छ । मन्थली नगरपालिकाको मन्थली माविले जस्तै अन्य विद्यालयले पनि दृढ इच्छा शक्ति र त्यसलाई कार्यान्वयन गर्ने अठोटका साथ अगाडि बढ्ने हो भने सामुदायिक विद्यालयको शिक्षामा गुणस्तर आउने कुरामा दुईमत छैन ।