मन्थली माविलाई भवन बुझायो खानीले

रामेछाप । खानी निर्माण जेभीले मन्थलीको मन्थली माविका नौ वटा भवनका ७४ कक्षा कोठाको रेक्ट्रोफिट(प्रबलीकरण) गरी बुधवार हस्तान्तरण गरेको छ । यो सँगै विद्यालयले कक्षा कोठाका लागि बर्षेनी भोग्दै आएको समस्याबाट मुक्ति पाएको हो । निर्माण कम्पनीले भवन सँगै शौचालय, कम्पाउन्डवाल, खेल मैदान लगायतका काम सम्पन्न गरी नेपाल सरकार शिक्षा विकास इकाई रामेछाप मार्फत मन्थली नगरपालिकालाई ती भवनको साँचो हस्तान्तरण गरेको हो ।
उक्त भवनको साँचो मन्थली नगरपालिकाका प्रमुख लव श्रेष्ठले विद्यालय व्यवस्थापन समितिका अध्यक्ष तेजप्रसाद सुवेदी र विद्यालयका प्राचार्य टंक प्रसाद दाहाललाई सामूहिक रूपमा हस्तान्तरण गरे।
सो अवसरमा मन्थली नगरपालिका प्रमुख लव श्रेष्ठले विद्यालय व्यवस्थापन समिति, शिक्षक र अभिभावकहरु बिचको त्रिकोणात्मक सम्बन्धले मात्र शिक्षाको गुणस्तरमा सुधार हुने भन्दै यसका लागि मन्थली माविले धेरै काम गर्न बाँकी रहेको बताए । मन्थली मावि सँग जिल्लाका अन्य विद्यालयको तुलनामा गुणात्मक शिक्षा सँगै रचनात्मक काममा पनि नमुना बनेर देखाउनु पर्ने चुनौती रहेको बताए ।
प्रधानाध्यापक टङ्कप्रसाद दाहालले भवनको हस्तान्तरण सँगै विद्यालयले वर्षौ देखि भोग्दै आएको कक्षा कोठाको समस्याले मुक्त पाउने विश्वास गरे ।
एसियाली विकास बैङ्कको सहयोगमा नेपाल सरकारको केन्द्रीय आयोजना कार्यान्वयन इकाई शिक्षासँग ९ करोड १४ लाख रुपैयाँमा ठेक्का सम्झौता गरेको निर्माण कम्पनीले थप काम समेत करिब १२ करोड रुपैयाँको लागतमा गरेको भए पनि उक्त भवनको अन्तिम मूल्याङ्कनको प्रतिवेदन आउन बाँकीनै रहेको छ ।