रामेछाप । जिल्लाका स्थानीय तहको आर्थिक वर्ष २०७९÷०८० को बेरुजू २१ करोड ६२ लाख १९ हजार रुपैयाँ रकम देखिएको छ । महालेखापरीक्षकको कार्यालयले प्रकाशन गरेको ६१औँ लेखापरीक्षणको प्रतिवेदनमा रामेछापका स्थानीय तहको बेरुजू रकम २१ करोड ६२ लाख १९ हजार रुपैयाँ देखिएको छ ।
महालेखापरीक्षकको प्रतिवेदन अनुसार रामेछापका ८ स्थानीय तहको जम्मा रकमको १ दशमलव ७२ प्रतिशत बेरुजू देखिएको छ । रामेछापका ८ स्थानीय तहबाट १२ अर्ब ५३ करोड ९८ लाख ५५ हजार रुपैयाँ रकमको लेखापरीक्षण भएको थियो । ८ स्थानीय तह मध्ये खाँडादेवी गाउँपालिकाको सबै भन्दा बढी बेरुजू देखिएको छ भने सबै भन्दा कम बेरुजु दोरम्बा शैलुङ्ग गाउँपालिकाको देखिएको छ । खाँडादेवी गाउँपालिकाको बेरुजू ६ दशमलव ६७ प्रतिशत पुगेको छ । दोरम्बा शैलुङ्ग गाउँपालिकाको ० दशमलव १५ प्रतिशत बेरुजु छ ।
जिल्लाका स्थानीय तहहरूले गएको वर्ष भन्दा बेरुजु अङ्क घटाएका छन् । अघिल्लो वर्ष ३७ करोड ७९ लाख ७ हजार बेरुजु रहेको थियो भने यो वर्ष उक्त रकमबाट घटेर २१ करोड ६२ लाख १९ हजार रुपैयाँ मात्रै छ ।
अघिल्लो वर्ष बेरुजूमा पहिलो नम्बरमा रहेको खाँडादेवी गाउँपालिका यो वर्ष पनि बेरुजु बढी आउने पालिकामा परेको छ । १ अर्ब ४९ करोड ७२ लाख ८ हजारको लेखापरीक्षण हुँदा ९ करोड ९७ लाख ९० हजार अर्थात् ६ दशमलव ६७ प्रतिशत बेरुजु देखिएको छ । खाँडादेवीको अघिल्लो वर्षको तुलनामा यस वर्ष बेरुजूको अङ्क भने घटेको छ । अघिल्लो वर्ष १ अर्ब ४७ करोड ८५ लाख ३ हजारको लेखापरीक्षण हुँदा ९ करोड २९ लाख १३ अर्थात् ६ दशमलव २ प्रतिशत बेरुजू देखिएको थियो ।
लिखुतामाकोशी गाउँपालिकाको १ अर्ब ५१ करोड ८४ लाख ९१ हजारको लेखापरीक्षण हुँदा १ करोड ७० लाख ४४ हजार अर्थात् १ दशमलव १२ प्रतिशत बेरुजू देखिएको छ । गाउँपालिकामा अघिल्लो वर्षको तुलनामा यो वर्ष झनै बेरुजू रकम घटेको छ । अघिल्लो वर्षको प्रतिवेदनमा लिखुतामाकोशी गाउँपालिकाको ४ करोड ९३ लाख ८ हजार रुपैयाँ अर्थात् ४ दशमलव ०४ प्रतिशत बेरुजू आएको आएको थियो ।
२ अर्ब २५ करोड १३ लाख १८ हजारको लेखापरीक्षण हुँदा १ करोड ८८ लाख ४० हजार अर्थात् ० दशमलव ८४ प्रतिशत मात्रै मन्थली नगरपालिकाको बेरुजु देखिएको छ । मन्थली नगरपालिकाको बेरुजू रकम अघिल्लो वर्षको तुलनामा यो वर्ष भने घटेको छ । अघिल्लो वर्ष २ अर्ब २४ करोड १३ लाख २ हजारको लेखापरीक्षण हुँदा नगरपालिकाको बेरुजू ५ करोड २० लाख ५८ हजार अर्थात् २ दशमलव ३२ प्रतिशत हुन आएको थियो ।
उमाकुण्ड गाउँपालिकाको ५ करोड १३ लाख ४७ हजार अर्थात् ३ दशमलव ७७ प्रतिशत बेरुजु देखिएको छ । गाउँपालिकाको १ अर्ब ३६ करोड १३ लाख ४४ हजार रकमको लेखापरीक्षण भएको थियो । अघिल्लो वर्षको तुलनामा यो वर्ष उमाकुण्ड गाउँपालिकाको बेरुजु रकम वृद्धि भएको छ । अघिल्लो वर्ष १ अर्ब २५ करोड १५ लाख ६३ हजारको लेखापरीक्षण हुँदा २ करोड ४७ लाख ९१ हजार अर्थात् १ दशमलव ९८ प्रतिशत बेरुजू देखिएको थियो ।
गोकुलगंगा गाउँपालिकाको अघिल्लो वर्षको तुलनामा बेरुजु रकम घटेको छ । १ अर्ब ३९ करोड ७५ लाख ८८ हजारको लेखापरीक्षण गर्दा १ करोड ९६ लाख ६३ हजार अर्थात् १ दशमलव ४१ प्रतिशत मात्रै बेरुजु देखिएको छ । अघिल्लो वर्ष गाउँपालिकाको १ अर्ब ३५ करोड ९५ लाख ८८ हजारको लेखापरीक्षण गर्दा ५ करोड ६९ लाख ३१ हजार अर्थात् ४ दशमलव १९ प्रतिशत बेरुजू देखिएको थियो ।
सुनापति गाउँपालिकाको ३४ लाख ५८ हजार अर्थात् ० दशमलव २७ प्रतिशत मात्रै बेरुजु देखिएको छ । अघिल्लो वर्ष भने सुनापति गाउँपालिकाको बेरुजु रकम ४ करोड ७९ लाख ४५ हजार अर्थात् ३ दशमलव ९४ प्रतिशत रहेको थियो । अघिल्लो वर्ष ५ करोडको हाराहारीमा रहेको सुनापति गाउँपालिकाको बेरुजू रकम यो वर्ष घटेर लाखमा झरेको छ ।
१ अर्ब ८८ करोड ८९ लाख ६५ हजारको लेखापरीक्षणमा रामेछाप नगरपालिकाको ४० लाख ७७ हजार अर्थात् ० दशमलव २२ प्रतिशत मात्रै बेरुजु देखिएको छ । नगरको अघिल्लो वर्षको जस्तै यो वर्ष पनि बेरुजू अङ्कमा केही सुधार आएर बेरुजू रकम घटेको छ । अघिल्लो वर्ष २ अर्ब ३५ करोड २९ लाख ७ हजार रुपैयाँको लेखापरीक्षण हुँदा ७२ लाख ८३ हजार रुपैयाँ अर्थात् ० दशमलव ३१ प्रतिशत बेरुजु थियो ।
दोरम्बा शैलुङ्ग गाउँपालिकामा १ अर्ब ३२ करोड ४ लाख ३० हजार रुपैयाँको लेखापरीक्षण हुँदा २० लाख रुपैयाँ मात्रै बेरुजू देखिएको छ । जुन रकम लेखापरीक्षण गरेको जम्मा रकमको ० दशमलव १५ प्रतिशत हो । अघिल्लो वर्ष १ अर्ब २२ करोड ४४ लख ७५ हजारको लेखापरिक्षण गर्दा ४ करोड ६६ लख ७८ हजार अर्थात् ३ दशमलव ८१ प्रतिशत बेरुजू आएको थियो । गाउँपालिकाले यो वर्ष भने बेरुजु रकमलाई ह्वात्तै घटाएको छ ।
