रामेछाप । जिल्लाको मन्थली नगरपालिका मन्थलीमा सांस्कृतिक सङ्ग्रहालय निर्माण गरिने भएको छ । संस्कृति संरक्षण तथा सामाजिक विकास केन्द्र काठमाडौँले सङ्घ, प्रदेश र स्थानीय सरकार सहित विभिन्न सङ्घ संस्थाहरूको सहयोग तथा आवश्यक समन्वयमा सांस्कृतिक सङ्ग्रहालय निर्माण गर्न लागेको पत्रकार सम्मेलन गरी जानकारी दिइएको छ ।
पत्रकार सम्मेलन मन्थली नगरपालिका नगर प्रमुख लव श्रेष्ठको प्रमुख आतिथ्यतामा भएको थियो । पत्रकार सम्मेलनमा संस्कृति संरक्षण तथा सामाजिक विकास केन्द्र काठमाडौँकी अध्यक्ष सीता सुनुवारले नेपाली कला, मौलिकता, परम्परा र पहिचान गरी लोप उन्मुख सकारात्मक संस्कृतिको संरक्षण गर्ने उद्देश्यले मन्थली नगरपालिका–२ आकाशे स्थित सेफ हाउस मुनि सात रोपनी जमिनमा सांस्कृतिक सङ्ग्रहालय निर्माण गर्न लागिएको जानकारी गराइन् । सङ्ग्रहालय निर्माणले जिल्लामा पर्यटन विकास हुनुका साथै सांस्कृतिक अध्ययन स्थल निर्माण हुने र सामाजिक चेतना र स्वास्थ्य स्तरमा सकारात्मक सुधार ल्याउन सहयोग पुग्ने सुनुवारले बताइन् ।
संस्कृति संरक्षण तथा सामाजिक विकास केन्द्रले एक वर्षदेखि सांस्कृतिक सङ्ग्रहालय निर्माणका लागि जग्गा उपलब्ध गराउन आग्रह गरेकाले नगरपालिकाले जग्गाका लागि सम्बन्धित निकायमा सिफारिस गरेको नगर प्रमुख लव श्रेष्ठले बताए । नेपाली कला, मौलिकता, परम्परा र पहिचान गरी लोप उन्मुख सकारात्मक संस्कृतिको संरक्षण गर्न सांस्कृतिक सङ्ग्रहालय निर्माण गर्नु अत्यावश्यक रहेकाले यसको निर्माणका लागि मन्थली नगरपालिकाले सहयोग गर्ने पनि श्रेष्ठले बताए ।
मन्थलीमा बन्ने भयो सांस्कृतिक सङ्ग्रहालय
Leave a Reply
