रामेछाप । मङ्गलवार रातीको अविरल वर्षाका कारण जिल्लाको लिखुतामाकोशी गाउँपालिकाका अध्यक्ष केशव महतको घर भत्कियो । उनको घरको एक पाखा पुरै भत्कियो । भत्किएको आफ्नो घरको कुनै वास्ता नगरी महत नागरिकको समस्या सुल्झाउन निस्किए ।
आफ्नो घरको बारेमा पछि सोचौला, पहिले नागरिकको घरको समस्यालाई महत्त्व दिन पर्छ भनेर आफू नागरिकको समस्या सुल्झाउन निस्किएको उनले बताए । उनले भने, लिखुका नागरिकले भोट दिएर अभिभावक बनाएका हुन् मलाई। उनीहरूलाई समस्या पर्दा म कसरी मेरो घरको समस्या देखाएर घरमै बस्न सक्थे ?
अविरल वर्षपछिको बाढी पहिरोले लिखु मात्रै नभएर रामेछापमा विभिन्न स्थानका क्षति भएको छ । सडकहरू आंशिक तथा पूर्ण रूपमा अवरुद्ध बनेका छन् । मङ्गलवार रातिको अविरल वर्षापछि ठाउँ ठाउँमा पहिरो खस्दा रामेछापको लिखुतामाकोशी गाउँपालिकाको धोबी–सैपु सडक खण्ड पूर्ण रूपमा अवरुद्ध भएको थियो ।
अविरल वर्षाका कारण ठाउँ ठाउँमा पहिरो खस्दा धोबी–सैपु सडक पूर्ण रूपमा अवरुद्ध भएको अध्यक्ष महतले बताए । उनले भने “अविरल वर्षाका कारण ठाउँ ठाउँमा पहिरो खसेर धोबी–सैपु सडक पूर्ण रूपमा अवरुद्ध बनेको थियो । तर अहिलेलाई सडक सुचारु गरेका छौँ। अब रातीको वर्षातका कारण के हुन्छ भन्न सकिन्न ।
वर्षात पछिको पहिरोका कारण लिखूतामाकोशी गाउँपालिका वडा नं. ३ का सहदेव खड्काको घर भत्किएको छ । उत्त पहिरोले अर्जुन खड्का,कृष्ण खड्का र टेक बहादुर खड्काको घर समेत जोखिम परेको छ।
यस्तै खाँडादेवी गाउँपालिका–८ मा पनि वर्षापछिको पहिरोले सडक अवरुद्ध भएको छ । अवरुद्ध सडक खुलाउनका लागि गाउँपालिकाले डोजर पठाएर बाटो खुलाईएको गाउँपालिकाका अध्यक्ष ज्ञानकुमार श्रेष्ठले बताए ।
