रामेछाप । जिल्लाको सुनापति गाउँपालिकाले चालु आर्थिक वर्षको ८ महिनाको अवधिमा ४६ प्रतिशत बजेट खर्च गरेको छ ।
गाउँपालिकाले चालु आर्थिक वर्ष २०८१/०८२ को साउनदेखि फागुन महिनासम्म जम्मा ५६ करोड ९० लाख ५२ हजार रुपैयाँ बजेटको ४६.८४ प्रतिशत अर्थात् २६ करोड ६५ लाख ८४ हजार ३९२ रुपैयाँ खर्च गरेको हो ।
यो अवधिसम्म चालु तर्फ ३६ करोड ६६ लाख ९० हजार ८०० रुपैयाँ बजेट रहेकोमा ५५.३८ प्रतिशत अर्थात् २० करोड ३० लाख ७४ हजार ९९३ रुपैयाँ बजेट खर्च भएको बिहीबार गाउँपालिकामा सम्पन्न सार्वजनिक सुनुवाइ कार्यक्रममा प्रमुख प्रशासकीय अधिकृत सुरेश कुमार श्रेष्ठले बताए ।
दोस्रो चौमासिकसम्म गाउँपालिकाले सञ्चालन गरेको विकास निर्माण तथा सेवा प्रवाह विषयमा भएको सार्वजनिक सुनुवाइ कार्यक्रममा प्रमुख प्रशासकीय अधिकृत श्रेष्ठले पुँजीगत तर्फ २० करोड २३ लाख ६१ हजार २०० रुपियाँ बजेट रहेकोमा ३१.३८ प्रतिशत अर्थात् ६ करोड ३५ लाख ९ हजार ३९८ बजेट खर्च भएको बताए ।
पाँच वटा वडा रहेको सुनापति गाउँपालिकामा चालु आर्थिक वर्ष २०८१/०८२ मा ९० वटा भन्दा बढी योजनाहरू सम्पन्न हुनुपर्नेमा ४४ वटा योजनाको भुक्तानी भएको उनले बताए ।
