रामेछाप । रामेछापका प्रमुख जिल्ला अधिकारी श्यामकृष्ण थापाले आफ्नो कार्यकालमा जिल्ला आउँदा भन्दा जाने बेलामा बढी शुभकामना र बधाई दिने गरी काम गर्ने बताएका छन् । रामेछापका प्रमुख जिल्ला अधिकारीको जिम्मेवारी सम्हालेपछि सोमबार जिल्ला स्थित पत्रकारहरूसँग परिचयात्मक कार्यक्रम सिडिओ थापा भने, “अहिले म धेरै कुरा भन्दिन । तर ढुक्क हुनुहोस् मेरो कार्यकालमा केही न केही देखिनेका खालका काम हुन्छन् । जिल्ला आउँदा जसरी शुभकामना दिनुभयो । जाने बेलामा पनि यो भन्दा बढी शुभकामना र बधाई दिने गरी काम गर्छु ।”
उनले सरकारी कार्यालयहरूले नियम अनुसार आफूले गर्नुपर्ने सार्वजनिक सुनुवाइ कार्यक्रम गर्नुपर्ने भएकाले सोही अनुसार हुने बताए । सबै कार्यालयले एकै चोटि एउटै ठाउँमा नभई विषयगत कार्यालयहरूलाई मिलाएर आफूले गरेको कार्यसम्पादनको अवस्थाका बारेमा सार्वजनिक सुनुवाइ कार्यक्रम गर्ने व्यवस्था गरिने उनको भनाइ छ ।
थापाले जिल्लाका विभिन्न ठाउँमा समयमै काम हुन नसकेर रुग्ण बनेका योजनाहरूलाई सम्पन्न गराउन सरोकारवाला निकायसँग आवश्यक समन्वय गर्ने बताए । यसका लागि पूर्वाधार निर्माणसँग सम्बन्धित कार्यालयका प्रमुखहरूसँग छलफल गरेर अगाडी बढ्ने बताए ।
जिल्लामा सञ्चालित हाइड्रोपावरहरुले नियम अनुसार पानी नछोडेको लगायत सामाजिक उत्तरदायित्वसँग जोडिएका गुनासो आएको बताउँदै जिल्ला स्थित सबै हाइड्रोपावरहरुसँग बसेर नियम अनुसार सामाजिक उत्तरदायित्वमा जिम्मेवार बनाउन प्रशासन लाग्ने उनको भनाइ छ ।
कार्यालयमा कर्मचारीहरू नियमित नहुने र कार्यालय प्रमुखहरू हप्तै पिच्छे काठमाडौँ जाँदा सरकारी सवारीको दुरुपयोग भएको भन्ने गुनासोबारे पनि जिल्ला प्रशासनको ध्यान गएको उनले बताए ।
नागरिकता लिने कुरामा सबै प्रक्रिया पुरा भएको समयमा २० मिनेट भित्र नै नागरिकता प्राप्त हुने भए पनि रामेछापमा नागरिकताका विषयमा विभिन्न समस्याहरू देखिएको उनको भनाइ छ । उनले भने “नागरिकता भन्ने विषय अत्यन्तै संवेदनशील कुरा हो । हाम्रो देशमा मात्रै होइन अन्य देशमा पनि लामो प्रक्रिया र पर्याप्त कागजात भएपछि मात्रै नागरिकता दिइन्छ । हाम्रो बुझाई तत्काल नागरिकता भन्ने हुन्छ । तर नबुझी तत्काल नागरिकता हुँदैन । आवश्यक प्रक्रिया तथा कागजात भएमा २० मिनेट भित्रै नागरिकता प्राप्त हुन्छ ।”
१६ वर्षमा नागरिकता पाइने भए पनि ४० वर्ष भएपछि नागरिकता लिन आएपछि त्यो व्यक्तिमाथि शङ्का उत्पन्न हुने र उक्त शङ्का निवारणका लागि आवश्यक अनुसन्धान गर्नुपर्दा नागरिकता दिन ढिलाइ हुने उनले बताए ।
आउँदा भन्दा जाने बेलामा बढी शुभकामना दिने गरी काम गर्छु: प्रजिअ थापा
