रामेछाप । रामेछापमा निर्माणको अन्तिम चरणमा पुगेको पक्की पुल भाँचिएको छ । जिल्लाको मन्थली नगरपालिका–६ को कुनाउरीबाट वडा नं ७ भटौलीको ठेडिखोला जोड्ने तामाकोशीमाथि निर्माणाधीन पुल भत्किएको हो ।
कालिका–कल्पवृक्ष जेभीले निर्माण गरिरहेको यो पुलको गत वैशाख २६ गते एउटा स्ल्याब भाँचिएको थियो । त्यसपछि सो भाँचिएको स्ल्याब निर्माण कम्पनीले पुननिर्माण गरिरहेको थियो । तर आइतबार बिहान सोही भाँचिएको स्ल्याब पूर्णरुपमा भाँच्चिएको हो ।
कुल २ सय ३० मिटर लामो र ११ मिटर चौडामा निर्माण भइरहेको यो पुल २०८२ साल भदौ अन्तिमसम्म म्याद भए पनि असारमा निर्माण सम्पन्न हुने चर्चा भएको थियो । संघीय सरकार सडक विभाग पुल महाशाखा मार्फत पुल निर्माणका लागि २०७८ सालमा कालिका–कल्पवृक्ष जेभिले ठेक्का सम्झौता गरेको थियो ।
सरकारले पुल निर्माणका लागि भ्याट र पि एस आईटम बाहेक २२ करोड ५५ लाख ४० हजारमा ठेक्का सम्झौता गरेको थियो । उक्त रकम मध्ये करिब ६० प्रतिशत भन्दा बढी रकम निर्माण व्यवसायीले भुक्तानी प्राप्त गरिसको छ ।
यो पुल निर्माण पश्चात् काठमाडौँ रामेछापका लागि सहज यात्रा हुने आसा गरिएको थियो । यो पुल बनेपछि मन्थली खुर्कोट सडक हुँदै छोटो दुरीमा मन्थली नगरपालिका–७ भटौली सहित खाँडादेवी, दोरम्बा शैलुङ गाउँपालिकाको विभिन्न वडा पुग्न सहज हुने विश्वास लिइएको थियो । तर अन्तिम समयमा आएर पुल नै भाँचिए पछि निर्माणकार्य र छोटोदुरी यात्रामा अन्यौलता थपिएको छ ।
पुल भाँचिनुको कारण खुल्न भने बाँकी नै रहेको छ । निर्माण कम्पनीले तत्काल विज्ञ टोली ल्याएर क्षति सम्बन्धमा प्राविधिक जाँच गराउने जनाएको छ ।
