काठमाडौं, असोज १
प्रधानमन्त्री केपी शर्मा ओलीले पाखन्डी कुरा गरेर प्रतिगमन लाद्न खोज्यो भन्दैमा अलमलिन नहुने बताएका छन् ।
सातौं राष्ट्रिय विज्ञान दिवसका अवसरमा बुधबार काठमाडौंमा आयोजित कार्यक्रमलाई सम्बोधन गर्दै प्रधानमन्त्री ओलीले केही उत्ताउलाहरुले पाखन्डी कुरा गर्ने जन्मसिद्ध व्यवहार प्रदर्शन गरिरहेको आरोप लगाए ।
उनीहरुका उत्ताउला व्यवहारले विकासको पथमा लम्केको सरकारलाई कुनै फरक नपार्ने उनको भनाइ थियो ।
उनले केही स्वार्थी तत्वले मुलुकको विकासभन्दा उपलब्धिलाई भत्काउन खोज्ने प्रयास गरिरहेको भएपनि आफूहरु त्यसमा नअलमलिने स्पस्ट पारे ।
कार्यक्रममा प्रधानमन्त्री ओलीले विज्ञान र प्रविधिलाई उत्पादनसँग जोडेर ‘समृद्ध नेपाल, सुखी नेपाली’को राष्ट्रिय आकांक्षा पूर्तिमा सघाउन वैज्ञानिकहरुलाई आग्रह पनि गरे ।
उनले विज्ञानको क्षेत्रलाई बजेट थपेर काम गर्ने वातावरण बनाउन सरकार प्रतिबद्ध रहेको बताए ।
‘हाम्रो परम्परा अन्धविश्वासी होइन, वैज्ञानिक र प्रयोगात्मक हो । यस परम्परालाई आधुनिक प्रविधिसँग जोडेर उन्नत समाज विकासमा लाग्नुपर्छ’–प्रधानमन्त्री ओलीले भने ।
कार्यक्रममा कक्षा–१२ मा विज्ञान विषयमा उत्कृट अंक ल्याउने सात प्रदेशका सामुदायिक र निजी विद्यालयका एक/एक गरी १४ विद्यार्थीलाई पुरस्कृत गरिएको थियो ।
