१२ पुष,
काठमाडौँ । नेपाली कांग्रेसको संस्थापन इतर समूहले बहुमतको दम्भका आधारमा केन्द्रीय समितिको बैठकले गरेका निर्णय नसच्चिए पार्टी धरापमा पर्ने चेतावनी दिएको छ । महामन्त्री शशांक कोइराला निवासमा बसेको असन्तुष्ट पक्षको भेलाले बहुमतका नाममा पार्टीको विधि र विधान उल्लंघन गरेर निर्णय आएको भन्दै ति निर्णयहरु नमान्ने बताएको छ ।
कोइराला निवासमा भएको भेलापछि आयोजित पत्रकार सम्मेलनमार्फत वरिष्ठ नेता रामचन्द्र पौडेलले हिजो केन्द्रीय समितिले गरेका निर्णयहरु सच्याउन आग्रह गर्नुभयो । उहाँले प्रजातन्त्रको मर्म विपरीत गरिएका निर्णयहरुले पार्टीलाई कमजोर र धरासायी बनाउने जिकिर गर्नुभयो ।
कांग्रेस केन्द्रीय समितिको बैठकले हिजो वर्तमान कार्यसमितिको म्याद एक वर्ष थप गरेर पार्टीको महाधिवेशन अर्को वर्षको फागुनमा गर्ने, विभागहरु थप गर्ने लगायतका निर्णय गरेको थियो । तर ०७७ फागुनमा महाधिवेशन गर्ने निर्णय गलत मनसायका साथ गरिएको भन्दै पौडले समूहले असन्तुष्टि जनाएको छ । आफूले कांग्रेस एकढिक्का नभए कम्युनिष्टसँग मुकाबिला गर्न नसकिने कुरा पटक पटक सम्झाउँदा पनि सभापति देउवाले एकलौटी निर्णय गरेको महामन्त्री शशांक कोइरालाले बताउनुभयो ।
तर पार्टीको संस्थापन पक्षले भने हिजो केन्द्रीय समितिले गरेका निगर्णयहरुले कांग्रेसभीत्र कसैलाई घाटा नपु¥याउने जिकिर गरेको छ । कांग्रेस सहमहामन्त्री डा. प्रकाशशरण महतले पर्याप्त छलफल र गृहकार्यपछि होसियारीका साथ पार्टीले निर्णय लिएको बताउनुभयो । उहाँले सभापति शेरबहादुर देउवाले सहमति जुटाउनका लागि असन्तुष्ट पक्षसँग निरन्तर प्रयास गरेको स्पष्ट पार्नुभयो ।
सहमतिय पद्धतिमा जानका लागि लगातार गरेको छलफल टुंगोमा नपुगेपछि सभापति शेरबहादुर देउवाले बहुमतको अधिकार प्रयोग गरेको पाइएको छ । तर हाल मुलुकको राजनीतिमा प्रमुख विपक्षीमा खुम्चेको कांग्रेसको भविष्यका लागि यो निर्णय खतरनाक साबित हुन सक्ने टिप्पणी विश्लेषकहरुले गरेका छन् । प्रजातान्त्रिक पद्धतिमा सहमति नजुटे बहुमतिय पद्धतिमा जानुलाई अनौठो मान्न नसकिने भए पनि कांग्रेसका लागि त्यो सुःखद बन्न नसक्ने राजनीतिक विश्लेषक पुरन्जन आचार्यको भनाई छ ।
मुलुकको राजनीतिमा आफ्नो उपस्थिति कमजोर पार्दै गएको कांग्रेसले हालै सम्पन्न उपनिर्वाचनमार्फत आफ्नो जनाधार बलियो साबित भएको दाबी गर्दै आएको छ । तर उपनिर्वाचन लगत्तै पार्टीभित्र मौलाएको गुटगत राजनीतिले कांग्रेसको भविष्य अन्यौल पारेको जानकारहरु बताउँछन् । सहमतिय आधारमा अघि बढेर पार्टीलाई एकढिक्का पार्न नसके कांग्रेस थप कमजोर बन्दै जाने निश्चित छ ।
