१३ पुष,
नेपाली कांग्रेसको असन्तुष्ट पक्षले केन्द्रीय समितिले गरेको निर्णयमा आपत्ति जनाएको छ । महामन्त्री शशांक कोइराला निवासमा बसेको असन्तुष्ट समुहको भेलाले बहुमतका नाममा पार्टीको विधि विधान उल्लंघन गरेर निर्णय आएको भन्दै निर्णय नमान्ने जनाएको हो ।
यस्तै भेलाले सभापति शेरबहादुर देउवाले पार्टीलाई संकटमा धकेलेको निष्कर्ष निकाल्दै हिजोको निर्णयले पार्टीलाई थप धरासयी बनाएको आरोप लगाएको छ । वरिष्ठ नेता समेत रहेका रामचन्द्र पौडेलले महासमिति बैठकपछि संशोधन गरिएको पार्टी विधानको धज्जी उडाउने काम सभापतिबाट भएको आरोप लगाउनु भएको छ ।
महाधिवेशनको कार्यतालिका सार्वजनिक गर्ने नाममा आफुखुशी विधानका दफा निलम्बन गरिएको बताउदै उहाले पार्टी विधानको व्यवस्था निलम्बन गर्ने कुरा बहुमतबाट हुन नसक्ने भन्दै त्यसमा सहमति नखोजिएकोमा पनि आक्रोश पोख्नु भएको थियो ।
यस्तै महामन्त्री शशांक कोइरालाले पार्टीभित्र एकतामा जोड दिँदै बहुमतबाट गरिएको निर्णयले पार्टीलाई कमजोर बनाउने उल्लेख गर्नुभयो । सहमतिका लागि छलफल भइरहेकै बेला एक्कासी निर्णय भएको भन्दै कोइरालाले असन्तुष्टि व्यक्त गर्नुभयो ।
यस्तै पूर्वमहामन्त्री एवं वार्ता टोलीका संयोजक प्रकाशमान सिंहले सहमतिका पक्षमा आफुहरू हुँदाहुँदै पनि सभापति देउवा पक्षले बहुमतको दम्भ देखाएको बताउनु भयो ।
यता संस्थापनपक्षिय नेता तथा सहमहामन्त्री प्रकाशशरण महतले भने केन्द्रीय कार्यसमितिको बैठकले गरेका निर्णयका बारेमा कसैले पनि असहमति राख्नुपर्ने कारण नरहेको स्पष्ट पार्नुभएको छ ।
रिपोर्टर्स क्लब नेपालले गरेको साक्षात्कार बोल्दै नेता महतले सभापति शेरबहादुर देउवाले सबैसँगको छलफल र सहमतिपछि नै महाधिवेशनको मिति तोकेको जिकिर गर्नुभयो । यो समग्र पार्टीको चाहना भएको उहाले जिकिर गर्दै उहाले सोहीअनुसार वडादेखि सम्पूर्ण तहसम्मको अधिवेशन कार्यतालिका पनि सार्वजनिक गरिएको उल्लेख गर्नुभयो ।
हिजोको बैठकले महाधिवेशन ०७७ फागुनमा गर्ने, विभाग बढाएर ४७ वटा बनाउने, तरूण दलको कार्यकाल ६ महिना थप गर्नेसहित विभिन्न ९ वटा निर्णय गरेको थियो ।
