रामेछाप,असार २१ ,
मन्थली नगरपालिकाका नगर प्रमुख रमेश कुमार बस्नेतले अधिकासं सहकारी समस्यामा रहेको बताएका छन् । सदरमुकाम मन्थलीमा शनिबार कोशिश कृषि सहकारीले आयोजना गरेको कोशिस सहकारी र कोशिस संग सरोकारीको भूमिका विषयक अन्र्तक्रिया कार्यक्रममा बोल्दै प्रमुख बस्नेतले यस्तो बताएका हुन ।
उहाँले एकै किसिमका उद्देश्य भएका सहकारीले एउटै व्यक्तिलाई सदस्य बनाउँदै जाँदा आर्थिक कारोबारमा अपारदर्शिता कायम हुनुका साथै सहकारी र शेयर सदस्य बिचमा तालमेल मिल्न नसकेकोले सहकारीका सदस्य र सहकारी स्वयंलाई समेत समस्या पर्ने गरेको बताए ।
हाल मन्थली नगर भित्र मात्र ९० ओटा भन्दा बढी सहकारी संस्था रहेको भएपनि र धेरै जसो सहकारीको उद्देश्य एउटै भएकाले सहकारीका सदस्यहरुको आर्थिक विकासमा सहकारी अभियान सफल हुन नसकेको समेत नगर प्रमुख बस्नेतले बताएका छन् ।
साविकका मन्थली चिसापानी र तिल्पुङ्ग, गाविसका कुष्ठरोगबाट प्रभावित व्यक्ति र अपाङ्गता भएका व्यक्तिहरु लाई समुहमा संगठित गरि उनिहरुको सक्रियतामा १० वर्ष अघि संचालित कोशिश कृषि सहकारी संस्था लिमिटेडले अहिले ४० लाख बराबरको आर्थिक कारोबार गरीरहेको कार्यक्रम संचालक समेत रहेकी सहकारीकी सचिव कविता श्रेष्ठले बताइन ।
उनका अनुसार सहकारीले साविकको चिसापानी, मन्थली र तिल्पुङ गाविसलाई कार्यक्षत्र बनाएर अपाङ्गता भएका व्यक्ति र कुष्टरोगबाट प्रभावित व्यक्तिहरुलाई कृषि तथा आय आर्जन तर्फ लगाउँदै उनिहरुको आर्थिक र क्षमता विकासका लागि सहयोग पुग्ने गरी काम गरि रहेको छ ।
कोशिसमा हाल सहकारीमा १ सय ६५ जना सदस्य रहेका छन् । सहकारीले मुख्य कार्यक्षत्र साविकको चिसापानी, मन्थली र तिल्पुङ गाविसमा समूह गठन गरेर काम गरिरहेको छ । सहकारीले आगमी दिनमा आफ्नो कार्यक्षत्र विस्तार गर्ने पक्षमा रहेको समेत जानकारी गराएको छ ।
संस्थाका अध्यक्ष मोहन बहादुर बुढाथोकीको अध्यक्षतामा भएको उकार्यक्रममा उपप्रमुख माया कुमारी कार्की, जिल्ला सहकारी संघ रामेछापका कार्यबहाक अध्यक्ष हिमाल ढुङ्गेल, अपाङ्ग सचेतन सेवा केन्द्र रामेछापका अध्यक्ष एवं नेपाल पत्रकार महासंघ ३ नं. प्रदेशका सदस्य बद्री नयाँघरे अपाङ्ग लगाएतले सहकारीको माध्यमबाट फरक क्षमता भएका व्यक्तिहरुले समाजमा उदाहरणिय काम गरेकोले यस्ता सहकारीलाई सबैले सहयोग गर्नु पर्नेमा जोड दिए ।
