चैत्र २७,सम्झना श्रेष्ठ,
सिन्धुली । सिन्धुलीको कमलामाई नगरपालिकाको विपत् व्यवस्थापन निर्देशक तथा समन्वय समितिको बैठक बुधबार बसेको छ । नगरप्रमुख खड्ग बहादुर खत्रीको अध्यक्षतामा बसेको बैठकले विभिन्न निर्णयहरु गरेको छ । नगरपालिकाको विपत् व्यवस्थापन कोषमा अहिलेसम्म कुल ४ लाख १७ हजार ४२२ रुपैँया जम्मा भएको जानकारी गराइएको छ ।
यस्तै राहत प्याकेज वितरणको लागी विभिन्न मापदण्डहरु तय गरिएको छ । जसमा तलव तथा पेन्सन प्राप्त नगर्ने घरपरिवार हुनुपर्ने, सामाजिक सुरक्षा भत्ता प्राप्त नगर्ने घरपरिवार हुनुपर्ने जनाएको छ । यसैगरि खेतियोग्य जमिन नभएको र कमाइ नभएका घर–परिवार तथा. वैदेशिक रोजगारीमा संलग्न नभएको घर परिवार हुनुपर्ने उल्लेख छ ।
यस्तै बैठकले कोरोना भाइरस संक्रमण अन्तर्गत स्थापित आइशोलेसन सेन्टरमा अग्रपंक्तीमा काम गर्ने डक्टर तथा स्वास्थ्यकर्मिहरुलाई प्रोत्साहन स्वरुप ३ लाख रुपैयाँ उपलब्ध गराउने निर्णय गरेको छ । उक्त प्रोत्साहन रकमलाई अस्पताल प्रशासनको सिफारिस र अस्पताल व्यवस्थापन समितीको निर्णयको आधारमा सम्वन्धित डाक्टर तथा स्वास्थ्यकर्मीको वैँक खातामा उपलब्ध गराउने बताइएको छ । कमलामाई नगरपालिकाले अहिलेको सम्भावित माहामारीको विरुद्धमा द्रुत ब्यवस्थापनका कामहरु गर्दै आईरहेको जनाएको छ ।
