बैशाख २२,
काठमाडौं । बेलायतका प्रधानमन्त्री बोरिस जोनसनले एकपटक आफुलाई डाक्टरहरुले मृत घोषित गर्ने तयारी गरेको खुलासा गरेका छन् । ३ हप्ताअघि कोरोनाको उपचार गरेर स्वास्थ्यलाभ गरी अस्पतालबाट डिस्चार्ज भएका प्रधानमन्त्री जोनसले सो कुराको खुलासा गरेका हुन् । ५५ वर्षीय जोनसनमा २६ मार्चमा कोरोना संक्रमणको लक्षण देखा परेको थियो । त्यसलगत्तै उनी सेल्फ क्वारेन्टाइनमा बसेका थिए । क्वारेन्टाइनमा बसेर पनि अवस्था सुधार नभएपछि उनी लन्डनको सेन्ट थोमस अस्पतालमा भर्ना भएका थिए । उनी १२ अप्रिलमा अस्पतालबाट डिस्चार्ज हुनुअघि ९ अप्रिलसम्म आइसियुमा रहेका थिए ।
अखबार ‘द सन’ सँगको कुराकानीमा प्रधानमन्त्री जोनसनले अस्पतालको बसाईको अनुभवबारे बताएका छन् । उनले भनेका छन्, ‘अप्रिल ७ मा सेन्ट थोमस अस्पतालको आइसियुमा पुगेपछि मलाई धेरै अक्सिजन दिइयो । त्यति गर्दा पनि मेरो स्वास्थ्यमा खासै प्रगति देखिएन । म त्यो एकदमै कठिन समयलाई अस्वीकार गर्न सक्दिन । मेरो हालत ठिक थिएन । डाक्टरहरु केह गलत (मृत्यु) भइहाल्यो भने के गर्ने भनेर विकल्पहरुबारे सोचिरहेका थिए ।’
उनले भने, ‘मेरो अवस्था केही दिनमै यति बिग्रियो भनेर म आफैंलाई विश्वास गर्न गाह्रो भयो । मलाई त्यतिबेलाको याद छ कि म निकै निराश भएको थिए । मेरो अवस्था किन सुध्रिरहेको थिएन भनेर मैल बुझ्न सकिन । सबैभन्दा खराब स्थिति त्यतिबेला आयो, जतिबेला ५०–५० को अवस्था देखियो । डाक्टरहरुले मेरो विन्डपाइप मुनि एक ट्युब राखेका थिए । मैले त्यसबेला सोचेकी यस रोगका लागि कुनै औषधी छैन र कुनै उपचार पनि छैन । म कसरी यो रोगबाट ठिक हुँला भन्ने सोच आइरह्यो ।’ उनले निको भएर आइसकेपछि आफुलाई भाग्यमानी ठाठेका छन् । उनले भने, ‘म धेरै भाग्यमानी हुँ, किनभने मलाई अहिले ठिक भएको छ तर म जस्तै रोग लागेका अझै धेरै पीडितहरु उपचारमै छन् ।’
प्रधानमन्त्री जोनसनको यो साक्षात्कार उनकी श्रीमती मंगेतर क्यारी साइमन्डले इन्स्टाग्रममा आफ्नो भर्खरै जन्मिएको छोराको तस्बिर पोष्ट गरेसँगै बाहिर आएको हो । उनले छोराको नाम विल्फ्रेड ल्यायुर निकोलस जोनसन राखेका छन् । निकोलस प्रधानमन्त्री जोनसनको उपचारमा संलग्न डाक्टर हुन्, जसको नामबाटै उनले आफ्नो बालकको नाम राखेका थिए । पत्नी मंगेतरले बालक छोराको तस्बिरसँगै प्रधानमन्त्री जोनसनको जीवन बचाउने डाक्टरको प्रशंसा गरेकी छिन् । बेलायतमा अहिले कोरोना संक्रमणबाट २८ हजारभन्दा बढीको ज्यान गइसकेको छ ।
