असार ८,
रामेछाप । स्पेनिस ला लिगामा रियल मड्रिड लिग तालिकाको शिर्ष स्थानमा उक्लिएको छ । गएराति भएको खेलमा रियल सोसीयडाडलाई २–१ गोल अन्तरले पराजित गदै मड्रिड शिर्ष स्थानमा उक्लिएको हो । उसकोको जितमा करिम बेन्जिमा र सर्जियो रामोसले एक एक गोल गरेका थिए। त्यस्तै सोसीयडाडका लागि एक गोल भने मिकेल मेरिनोले फर्काएका थिए। पहिलो हाफ बिना कुनै गोल सकिएको खेलमा खेलको ५० औ मिनेटमा रामोसले पेनाल्टी मार्फत गोल गर्दै रियललाई अग्रता दिलाएका थिए।
त्यसपछि बेन्जिमाले खेलको ७०औ मिनेटमा गोल गर्दै रियलको अग्रता दोब्बर पारेका थिए। त्यसको दुई मिनेटपछि नै सोसीयडाडका अद्नान जानुजाजले गरेको गोल भारले अस्वीकृत भएको थियो । भारको यो विवादस्पद निर्णयको फाइदा रियल मड्रिलाई भएको छ। रियलको यो जितसँगै लिगमा बार्सिलोनासँग अंक बराबरी गर्दै शिर्ष स्थानमा उक्लिएको छ।
अब ३० खेलमा रियल मड्रिड र बार्सिलोनाको बराबर ६५ अंक भएको छ। त्यस्तै रियल सोसियडाडको भने ३० खेलमा ४७ अंक छ भने लिगको छैठौं स्थानमा रहेको छ।
उता इङलिस प्रिमियर लिग फुटबलमा चेल्सीले एस्टन भिल्लामाथि संघर्षपूर्ण जित हासिल गरेको छ । गएराति नै भएको खेलमा चेल्सीले भिल्लामाथि २–१ गोल अन्तरको जित हासिल गरेको हो । यो जितसँगै चेल्सीले महत्वपूर्ण ३ अंक बटुलेर प्रिमियर लिगमा ३० खेलमा ५१ अंकसहित चौथो स्थानमा रहेको छ । अब म्यानचेस्टर युनाइटेडभन्दा ५ अंकले अगाडी भएकाले चेल्सीले यस सिजनमा चौथो स्थान सुरक्षित गर्नसक्ने देखिएको छ।
त्यस्तै प्रिमियर लिग उपाधिका लागि दुई जित टाढा रहेको लिभरपुल भने एभर्टनसँग बराबरी खेलेको छ । गएराती नै सम्पन्न भएको खेलमा लिभरपुल एभर्टनसँग बिना कुनै गोल रोकिए पछि लिभरपुलको ३० बर्षपछि उपाधि जित्ने अवसर केहि दिन पर धकेलिएको छ । अब लिभरपुलले (भोली)मंगलबार राति क्रिस्टल प्यालेसविरुद्ध खेल्दै छ भने (आगामी)शुक्रबार राति म्यानचेस्टर सिटी विरुद्ध खेल्दै छ। file Photo
