रामेछाप। रामेछाप– दोलखा जिल्लाको रमणीय पर्यटकीय स्थलको रूपमा परिचित शैलुङ । शैलुङ डाँडा प्रकृतिले सुन्दर स्थलको रूपमा मात्र नभएर धार्मिक स्थलको रूपमा पनि परिचित छ । जहाँ जनैपूर्णिको दुई दिन अघि भव्य मेला लाग्ने गर्दछ । साथै, बाला चतुर्दशी, वर्षे मेला जस्ता चाडमा धेरै दर्शनार्थीहरूको भीड लाग्ने गर्दछ । शैलुङडाँडा १०० वटा अग्ला र होचा हेर्न लायक मनमोहक सुन्दर थुम्काथुम्की डाँडाहरूले जोडिएर बनेको छ ।
शैलुङमा हिजो बिहीबार देखी ‘वाइल्ड स्टे विथ चौंरी’ कार्यक्रम सुरु भएको छ । दोलखा र रामेछापको सिमानामा पर्ने शैलुङमा ‘स्पार्क एड्भेन्चर २०२३’ले ‘वाइल्ड स्टे विथ चौंरी’ कार्यक्रमको आयोजना गरेको हो । पर्यटन प्रवर्द्धनको लागि सो कार्यक्रम गरिएको आयोजकले बताएको छ ।
हिजो बिहान धुलिखेलको मिराबेल रिसोर्टमा पञ्चेबाजा सहित एड्भेञ्चरको उद्घाटन गरिएको थियो । उद्घाटनपछि २०० भन्दा बढीको टोलीले शैलुङको यात्रा सुरु गरेका हुन् । सो कार्यक्रममा ख्यातिप्राप्त कलाकारहरू सहभागी हुने आयोजकले बताएको छ ।
विश्व पर्यटन दिवसको अवसरमा क्यानडा, फ्रान्स र स्वीजरल्याण्ड लगायतका देशबाट २२ जनाको टोली शैलुङ क्षेत्रमा पुगेका छन् । पालिका अध्यक्ष रिमलबाबु श्रेष्ठ र उपाध्यक्ष पार्वती कार्की थापा लगायतले टोलीलाई पालिकामा स्वागत गरेका थिए । उनीहरू हिजो, आज र भोली सम्म शैलुङमा हुने कार्यक्रममा सहभागी हुनेछन् । प्रचुर पर्यटकीय सम्भावना भएर पनि ओझेलमा परेको शैलुङ प्रवर्द्धनका लागि कलाकारहरू पनि जुट्ने भएका छन् ।
भोलीसम्म जारी रहने कार्यक्रममा कलाकारहरू निखिल उप्रेती, विजय लामा, प्रेमराजा महत, गरिमा शर्मा, यशकुमार, सन्दीप क्षेत्री, लेखक बुद्धि सागर लगायत आउनेछन् । शनिवार सम्म हुने कार्यक्रममा प्रशासनिक एवं सुरक्षा निकायका प्रतिनिधि पनि सहभागी हुने कार्यक्रम संयोजक अमरदीप भट्टराईले जानकारी दिए ।
आज शुक्रवार चौँरी गोठ र सैलुङलाई ‘एक्सप्लोर’ गर्ने आयोजकको तयारी छ । आन्तरिक पर्यटनको खोजी गर्ने, चौँरीसँग जङ्गलमा रात बिताउने, स्थानीय संस्कृति, स्वादिष्ट खाना र नयाँ रमणीय ग्रामीण गन्तव्य पत्ता लगाउने इच्छा भएका सहभागीले कार्यक्रममा भाग लिनेछन् ।
साहसिक पर्यटनको क्षेत्रमा समेत काम गर्दै आइरहेको स्पार्क कारले पर्यटकका लागि यातायातको व्यवस्थापन गर्ने कार्य गर्दै आइरहेको छ । गत वर्ष लमजुङको भुजुङमा भीर मौरीको सिकार गरेर सुरु भएको एड्भेन्चरको दोस्रो संस्करण शैलुङ र शैलुङ क्षेत्रमा पाइने चौँरी गोठलाई केन्द्रित गर्दै आयोजना गर्न लागिएको हो । यो कार्यक्रमको मुख्य उद्देश्य पर्यटन प्रवर्द्धन गर्ने रहेको आयोजकले जनाएको छ ।
शैलुङमा ‘वाइल्ड स्टे विथ चौंरी’
Leave a Reply
