रामेछाप। जिल्लाको खाँडादेवी गाउँपालिकामा आठौँ राष्ट्रिय प्रोफेसनल तेक्वान्दो आईटीएफ प्रतियोगिता सुरु भएको छ । आज र भोली हुने प्रतियोगितामा देश भरका ४४ खेलाडीले भाग लिएका छन् ।
प्रतियोगितामा महिलाहरूको ४७ देखि ५५ र पुरुष तर्फ ५० देखि ५७ केजी समूहका खेलाडीले प्रतिस्पर्धा गरिरहेका आयोजक संस्था नेपाल तेक्वान्दो आइटीएफ रामेछापका अध्यक्ष धनराज तामाङले बताए ।
प्रतियोगितामा सातवटै प्रदेश, विभागीय टिमहरू नेपाल आर्मी क्लब, एपीएफ क्लब तथा नेपाल पुलिस क्लब र आयोजक टिमका खेलाडीले भाग लिएका छन् । महिला र पुरुष दुवै तर्फ एउटा टिमबाट दुई/दुई जना खेलाडीले भाग लिएका छन् ।
नेपाल तेक्वान्दो आइटीएफ रामेछापको आयोजना तथा खाँडादेवी गाउँपालिका र खाँडादेवी गाउँपालिकाको वडा नं ७ को सहआयोजनामा प्रतियोगिता भएको हो ।
प्रतियोगिताको खाँडादेवी गाउँपालिका अध्यक्ष ज्ञानकुमार श्रेष्ठले दीप प्रज्वलित गरी उद्घाटन गरे । कार्यक्रममा मन्थली नगरपालिका प्रमुख लब श्रेष्ठ लगायतले प्रतियोगिता सफलताको शुभकामना दिए ।
प्रतियोगितामा प्रथम, द्वितीय र तृतीय हुने महिला र पुरुष दुवै तर्फका खेलाडीले नगद ५० हजार, ४० हजार र ३० हजार रुपैँया प्राप्त गर्ने छन् । विजेता खेलाडीलाई सिल्ड, मेडल र प्रमाणपत्र पनि प्रदान गरिने छ ।
