श्रीमान् जीवित छँदाछँदै मृत्युदर्ता प्रमाणपत्र बनाएर भत्ता बुझ्ने महिलालाई मंगलबार विशेष अदालतले दोषी ठहर गरेको छ । अदालतले रामेछापको मन्थली ३ का तत्कालीन वडासचिव शिवकुमार महतोलाई पनि दोषी ठहर गरेको छ ।
विशेष अदालतका प्रवक्ता धनबहादुर कार्कीका अनुसार न्यायाधीशहरू टेक नारायण कुँवर, तेजा नारायणसिंह राई र मुरारीबाबु श्रेष्ठको इजलासले भत्ता दिने वडा सचिव महतो र भत्ता लिने निर्मला खत्रीलाई दोषी ठहर गरेको हो । अदालतले वडासचिव महतो र भत्ता लिने निर्मला खत्रीलाई जनही ३ महिना कैद र १० हजार रुपैयाँ जरिवानाको फैसला सुनाएको हो ।
रामेछाप जिल्लाको मन्थली नगरपालिका ३, ठुलीमदौकी निर्मला खत्रीले आफ्नो श्रीमान् जीवित हुँदाहुँदै पनि श्रीमानको मृत्यु भएको प्रमाणपत्र बनाएर बिधुवा भत्ता बुझ्दै आएकी थिइन् । जिल्ला प्रशासन कार्यालय रामेछापमा कार्यालय सहयोगी पदमा कार्यरत रहेका उनका पति रामबाबु खत्री जीवित हुँदाहुँदै निर्मलाले श्रीमानको मृत्यु भएको भन्दै वडा कार्यालयबाट एकल महिला भत्ता बुझ्दै आएकी थिइन् । निर्मलाले गत वर्षको माघ महिनासम्म गरी कुल १५ महिनाको मासिक २ हजार ६६० रुपैयाँका दरले ३९ हजार ९ रुपैयाँ भत्ता बुझेकी थिइन् ।
निर्मलाको नाममा २०७८ साल भदौ २१ गते एकल महिला परिचयपत्र बनेको पाइएको थियो । तर एकल महिलाको भत्ता बुझ्न निर्मला सिन्दूर पोतेसहित बैंकमा पुगेपछि बैंकका कर्मचारीलाई शंका लागेर सोधपुछ गर्दा निर्मलाको श्रीमान् जीवित भएको खुलेको थियो । खत्रीलाई तत्कालीन वडा सचिव शिवकुमार महतोले २०७८ साल भदौ २१ गते सोही दिनदेखि लागू हुने गरी एकल महिलाको परिचयपत्र समेत बनाइदिएका थिए ।
श्रीमान् जीवित हुँदाहुँदै मृत्यु भएको भनी कागजात बनाई भत्ता लिएको पाइएपछि अख्तियारमा परेको उजुरीका आधारमा एकल महिलाको परिचयपत्र बनाइ भत्ता दिने शिवकुमार महतो र भत्ता लिने निर्मला खत्रीविरुद्ध अख्तियारले गत मंसिर ८ गते महतो र खत्रीविरुद्ध विशेष अदालतमा भ्रष्टाचारको मुद्दा दायर गरेको थियो ।
जीवित श्रीमानको मृत्यु भएको भनी भत्ता बुझ्ने महिला र मृत्युदर्ता गरिदिने वडासचिव दोषी ठहर
