रामेछाप । जिल्लाको रामेछापका नगरपालिका ९ टारगाउँका आगलागी पीडितलाई नेपाल तरण दल रामेछापले पानी राख्ने ट्याङ्की दिएको छ । बिहीबार पीडितहरूको घरमै पुगेर तरुण दलले एक घर एक ट्याङ्की दिएको हो ।
गत ३ गते (चैत्र ३ गते) टार गाउँ नजिकैको सामुदायिक वनमा लागेको आगो बस्तीमा लाग्दा १३ घरधुरीमा आगो लागेको थियो । पीडितहरूलाई ५ सय लिटरको १–१ हिलट्याङ्गी दिइएको तरुण दल रामेछापका उपाध्यक्ष बासु फुँयालले बताए ।
प्राप्त सहयोगलाई पीडितहरूको आवश्यकताको आधारमा वितरण व्यवस्थापन मिलाइएको रामेछाप नगरपालिकाका नगरप्रमुख लवश्री न्यौपानेले बताए । प्राप्त सहयोगहरू एकद्वार प्रणालीबाट वितरण गर्ने नीति बनाइएकोले पीडितलाई कुनै पनि अभावमा हुन नदिन प्रयास भएको नगर प्रमुख न्यौपानेले बताए ।
पीडितहरूको आवश्यकतालाई केही हद सम्म भए पनि समाधान गर्ने कोसिस गरिएको तरुण दल रामेछापका अध्यक्ष एवम् गोकुलगंगा गाउँपालिका अध्यक्ष काजीबहादुर खड्का (दिनेश) ले बताए । सहयोग प्रदान गर्न रामेछाप नगरपालिकाका प्रवक्ता तथा वडा अध्यक्ष समीर कार्की , तरुण दल रामेछापका उपाध्यक्ष जीवन कार्की लगायतको उपस्थिति रहेको थियो ।
टारगाउँमा आगलागीबाट १३ परिवार घरबार विहीन भएका थिए भने करिब २ करोडको क्षति भएको थियो ।
