रामेछाप । उमाकुण्ड गाउँपालिकाले आर्थिक वर्ष २०८२/०८३ का लागि ६१ करोड १३ लाख २३ हजार ४ सय २६ रुपैयाँको बजेट सार्वजनिक गरेको छ। मंगलबार सम्पन्न १८ औँ गाउँसभा (अधिवेशन) मा गाउँपालिका उपाध्यक्ष सावित्री सुनुवारले बजेट प्रस्तुत गरेकी हुन्।
सार्वजनिक बजेट अनुसार सातवटै वडामा तुलनात्मक रूपले समनुपातिक रकम विनियोजन गरिएको छ। वडा नम्बर १ गुम्देलका लागि ६१ लाख, वडा नम्बर २ बाम्तीभण्डारमा ६४ लाख, वडा नम्बर ३ कुबुकास्थलीमा ५५ लाख ५० हजार, वडा नम्बर ४ र ५ प्रिति क्षेत्रमा क्रमशः ६१ र ६२ लाख, वडा नम्बर ६ गुप्तेश्वरमा ५० लाख र वडा नम्बर ७ भुजीमा ६५ लाख ५० हजार रुपैयाँ छुट्याइएको छ।
गाउँपालिका अध्यक्ष शेरबहादुर सुनुवारले अधिवेशनमा आगामी वर्ष लागू गरिने ११८ बुँदे नीति तथा कार्यक्रम प्रस्तुत गरेका छन्। शिक्षा, स्वास्थ्य, खेलकुद र पूर्वाधार विकास क्षेत्रलाई विशेष प्राथमिकतामा राखेर नीति तर्जुमा गरिएको अध्यक्ष सुनुवारले जनाएका छन्।
शिक्षामा गुणस्तर वृद्धि, सामुदायिक स्वास्थ्य सेवा सुधार, ग्रामीण यातायात तथा खानेपानी पहुँच विस्तार, खेलकुद विकास र कृषि तथा पर्यटन पूर्वाधार निर्माण कार्यक्रममार्फत गाउँपालिकालाई दिगो विकासतर्फ अघि बढाउने योजना बनाइएको छ।
बजेट र नीति निर्माण प्रक्रिया यसपटक वडास्तरीय छलफल, सरोकारवाला सुझाव र स्थानीय आवश्यकता मूल्यांकनको आधारमा तय गरिएको गाउँपालिकाले जनाएको छ।
गाउँपालिकाका स्थानीय जनप्रतिनिधि र सेवाग्राहीहरूले योजनाको कार्यान्वयनमा पारदर्शिता, परिणाममुखीता र समावेशीताको प्रत्याभूति गर्नुपर्ने धारणा राखेका छन्।
